E dianan di fiesta di fin aña ta cerca y hopi comerciante ta importando mas y mas producto pa bende incluyendo containers cu klapchi.

Departamento di Aduana kier sigui brinda un bon servicio na tur cliente pa’sina haya nan carga mas liher posibel. En conexion cu esaki Aduana ta conseha y ta pidi e importadornan di klapchi pa tuma bon nota di reglanan y e proceduranan cu tin stipula pa’sina e containers di klapchi por sali for di Waf Barcadera na tempo y sin stagnacion.

Den cuadro cu esaki Aduana ta pidi tur importador di klapchi pa tin nan tramitenan di declaracion yena cu e informacion cu ta regarda e carga corecto y manda esaki den Asycuda prome cu e barco yega.

Tuma nota cu si e declaracion di e cargacion di klapchi no ta den e systema di Asycuda prome cu e barco yega, esaki lo tin su consequencianan unda e container di klapchi lo wordo tuma den beslag.

Pa gana tempo pa cu e proceso aki y mirando cu tin hopi declaracion ta drenta diariamente durante e periodo aki, ta pidi pa manda e number di registracion di e declaracion di klapchi pa Aduana usando email info@douane.aw y esaki lo wordo pasa pa e seccion cu ta procesa e declaracion.