Den ultimo tempo Departamento di Aduana a tuma nota di un producto cu ta ser bendi den varios tienda y supermercado local clasifica como sigaria pero sin cello conforme ley. Ta trata aki di e producto “Racer Cigars” di diferente sabor manera cherry, menthol, peach, strawberry, smooth y full flavor

Pa importa sigaria, Departamento di Aduana ta informa cu un persona mester tin un permiso di Aduana como importador di sigaria y mester paga accijns riba e producto aki. Ademas e producto mester tin su cello corespondiente riba e paki manera prescribi den ley como prueba di importacion legitimo di sigaria.

Departamento di Aduana ta pidi tur tienda y supermercado local cu tin e “Racer Cigars” actualmente na benta sin permiso legal di importacion pa porfabor entrega e productonan aki inmediatamente. Den e caso aki lo haci un excepcion y lo duna oportunidad pa trece e productonan voluntariamente na Aduana entrante e awe dia 27 di september te cu dia 30 di october 2021. Esaki ta pa haci coordinacionnan cu Aduana pa manda e productonan den exterior of pa nan wordo destrui.

Tuma bon nota cu despues di e fecha di entrega menciona, Aduana lo bay ehecuta su control. Si acaso encontra e producto en cuestion, e bendedor lo ricibi un multa.

Departamento di Aduana ta spera di por a informa tur cliente y pueblo di Aruba debidamente.