Temporada di vakantie ta den porta y hopi di nos hendenan local ta preparando pa bai cu vakantie pronto of ta preparando pa ricibi famia y hendenan keri for di exterior. En conexion cu e temporada di vakantie Departamento di Aduana kier a informa pueblo over di e tareanan cu e ta eherce y pakiko Aduana ta eherce e tarea aki.

Tareanan di Departamento di Aduana

Departamento di Aduana tin dos tarea di suma importancia pa pais Aruba. E prome tarea ta esun Fiscal, cual ta cobra impuesto di entrada y accijns pa asina jena e caha di gobierno.

E di dos tarea di Departamento di Aduana ta esun non-fiscal, cual nos ta jama e “VGEM taken” cu tin di haber cu salvaguardia y protehe e interesnan di pais Aruba.

Departamento di Aduana ta coopera y traha hunto cu otro organisacionan nacional y internacional y ta cumpli cu diferente leynan pa controla y vigila e frontera.

Na momento di importacion di producto Departamento di Aduana ta traha cu Veterinaire dienst, Gezondheidsdienst,Inspectie geneesmiddelen y DTZ pa loke ta trata productonan cu tin di mester di permiso di importacion y tambe ta detene mercancia ilicito.

Departamento di Aduana ta spera cu tur persona preparando pa biaha den e temporada di vakantie por tene cuenta cu e informacion aki pa asina por goza di un vakantie sin preocupacion. Y e yegada na Aruba na territorio Aduanero por bai mas “smooth” posibel sin ningun inconveniencia.

De caso cu tin cualkier pregunta encuanto e trabounan di Aduana of rekisitonan cu tin di haber na momento di Sali for di Aruba manera e rekisitonan na momento di jega Aruba back por bishita nos website www.douane.aw of por tuma contacto via nos emailadres: info@douane.aw of jama nos na telefon 523-8888.