Departamento di Aduana ta recorda tur importador di klapchi pa no warda te na ultimo momento pa hasi nan declaracion (aangifte) pa cargacion di klapchi den asycuda. E declaracion di container di klapchi mester ta hinka den asycuda prome cu e cargacion yega Aruba.

Mirando cu nos ta den e temporada di mas druk den aña, unda hopi comerciante ta importa productonan pa bende net prome of durante e temporada di fiesta nos ta urgi tur comerciante y importador di klapchi pa nan tin tur tramite di declaracion di nan klapchinan kla prome cu e container yega Aruba.

Na momento cu e container yega Aruba y e declaracion (aangifte) no ta hinka den e sistema di Aduana, e cargacion lo wordo tuma den beslag y destrui pa e autoridadnan concerni cu tur e consecuencianan cu e inversion ta bai perdi.

Departamento di Aduana kier a remarka cu te na e momentonan aki a ricibi 1 declaracion so di cargacion di klapchi y ta pidi tur comerciante y importador pa manda tur e papeleo na nan broker pa esakinan por hasi tur e tramitenan na tempo prome cu e container yega Aruba.

Banda di hasi e declaracionan na tempo, Departamento di Aduana ta recorda tur importador pa manda documentacion correcto pa e proceso por cana su caminda sin niun dificultad y no wordo tranka pa culpa di e mesun comerciante y/of importador manera tabata e caso den pasado.